خامنەیی:ناکرێ پرسی فەڵەستین لە بیروڕای گشتی جیهان بشاردرێتەوە

00:44 2023-12-05 60538 عەرەبی و نێودەوڵەتی 0

2023-12-05

60538

ڕێبەری باڵای ئێران، ئێوارەی ئەمڕۆ لە میانەی دیدار لەگەڵ میگێل دیاز کانێل، سەرۆک کۆماری کوبا و شاندی یاوەری، ئاماژەیان بە توانا سیاسی و ئابوورییە گەورەکانی دوو وڵات کرد و جەختیان لەوە کردەوە کە تواناکان بۆ پێکهێنانی هاوپەیمانی بەکاربهێنرێن و هاوپەیمانییەک لە نێوان ئەو وڵاتانەی کە هەمان هەڵوێستیان هەیە لە دژی دەستدرێژی ئەمریکا و ڕۆژئاوا بەکاربهێنرێت.
خامنەیی وتیشی: ئەم هاوپەیمانییە کە تیشک دەخاتە سەر هاوکاری ئابووری، دەتوانێت هەڵوێستێکی هاوبەش و کاریگەر لە پرسە گرنگەکانی جیهانی وەک پرسی فەڵەستین وەربگرێت.
سەبارەت بە پرسەکانی پەیوەست بە فەڵەستین، ڕێبەری باڵای ئیران ئاماژەی بەوەدا: پرسی فەڵەستین تەنیا پەیوەندی بە دۆخی ئەم دواییەی غەززە و تەقینەوەکانەوە نییە، چونکە گەلی فەڵەستین هەمیشە تووشی هەموو جۆرە ئەشکەنجە و ئازار و کوشتنێک بووە لە ماوەی ٧٥ ساڵی ڕابردوودا، بەڵام ئێستا کارەساتەکەی غەززە ئەوەندە گەورەیە کە ڕاستییەکان بۆ ڕای گشتی جیهان ئاشکرا بووە و ناتوانرێت بشاردرێتەوە.

خامنەیی هەڵوێستەکانی سەرۆک کۆماری کوبا لەمەڕ پرسە جیهانییەکان و بەتایبەتی پرسی فەڵەستین بە هاوتەریب لەگەڵ هەڵوێستەکانی کۆماری ئیسلامی زانی و بە ئاماژەدان بە هاوکارییەکانی نێوان دوو وڵات لە کۆڕبەندە نێودەوڵەتییەکان جەختیان کردەوە: پەیوەندییەکانی نێوان دوو وڵات پێویستە.
ڕێبەری باڵای ئێران بە ئاماژەدان بە دیداری ٢٢ ساڵ لەمەوبەر لەگەڵ فیدڵ کاسترۆی ڕێبەری کۆچکردووی کوبا وتیان: "ڕاستگۆیی شۆڕشگێڕانە"، "خۆڕاگریی شۆڕشگێڕانە" و "جددیەتی شۆڕشگێڕانە" تایبەتمەندی هاوبەشی شۆڕشی کوبا و شۆڕشی ئیسلامی ئێرانن.