خەزعەلی: هەڵبژاردن لە وادەی خۆیدا بەڕێوەدەچێت و ڕێژەی بەشداری دەنگدەران زیاتر دەبێت لەچاو هەڵبژاردنەکانی پێشوو

22:40 2025-10-31 25256 عێراق 0

2025-10-31

25256

قەیس خەزعەلی ئەمینداری گشتی عەسائیبی ئەهلی حەق دووپاتی کردەوە کە هەڵبژاردنەکان لە وادەی دیاریکراوی خۆیان ئەنجام دەدرێن و ئاماژەی بەوەدا کە ڕێژەی بەشداریکردن لە هەڵبژاردنەکانی داهاتووی پەرلەمانی عێراق لە چاو هەڵبژاردنەکانی پێشوو زیاتر دەبێت.
خەزعەلی لە گردبوونەوەیەکی هەڵبژاردن بۆ نەعیم عەبودی کاندیدی بزووتنەوەی سادقون ئەمڕۆ هەینی لە بەغدا ڕایگەیاند "هەڵبژاردنەکان لە وادەی دیاریکراوی خۆیان ئەنجام دەدرێن، هەروەها ڕێژەی بەشداریکردن لە هەڵبژاردنەکانی پێشوو زیاتر دەبێت".
بزووتنەوەی سادقونیشی بە " پێشەنگی ئەو هێزە سیاسییانەی کە لەم هەڵبژاردنانەدا کێبڕکێ دەکەن" داناو، دەشڵێت: "لەڕێگەی وەرگرتنی وەزارەتی خوێندنی باڵا، ویستمان سەرکردایەتی گەنج بۆ کۆمەڵگەیەکی گەنج دابین بکەین"، بە ئاماژەدان بە وەزیر نەعیم عەبودی.
قەیس خەزعەلی ئەوەی لە وەزارەتی خوێندنی باڵا بەدەست هاتووە بە "چیرۆکێکی دیکەی سەرکەوتن" وەسف دەکات و ئاماژەی بەوەدا کە "وەزارەتەکانی پەروەردە و خوێندنی باڵا بە پایەی گرنگ دادەنرێن بۆ بنیاتنانی دەوڵەت ئەگەر کارەکانیان بە دروستی جێبەجێ بکرێن".
ئەمینداری گشتی عەسائیبی ئەهلی حەق ئاماژەی بەوەدا کە "ئەوەی لە وەزارەتی خوێندنی باڵا و توێژینەوەی زانستی بەدەست هاتووە بەردەوام دەبێت لە پێناو گەیاندنی وڵات بۆ بەرزترین ئاستی سەرکەوتن".
شایەنی باسە ڕۆژی 21ی ئەیلولی 2024، وەزیری خوێندنی باڵا و توێژینەوەی زانستی، نەعیم عەبودی، هەڵبژاردنی بۆ سەرۆکی مەکتەبی سیاسی بزووتنەوەی سادقون ڕاگەیاند.