سودانى: عێراق پابەندە بە هەمەچەشنكردنی كەرتی وزە و كەمكردنەوەی دەردانی گازی ژەهراوی ‏

23:45 2025-07-23 62235 عێراق 0

2025-07-23

62235

ئەمڕۆ چوارشەممە، سەرۆكی ئەنجومەنی وەزیران محەمەد شیاع سودانی، جەختیکردەوە: عێراق پابەندە بە هەمەچەشنكردنی كەرتی وزە و كەمكردنەوەی دەردانی گازی ژەهراوی.
‏نوسینگەی راگەیاندنی سەرۆك وەزیران لە بەیاننامەیەكدا بڵاویکردەوە: سەرۆكی ئەنجومەنی وەزیران محەمەد شیاع سودانی، پێشوازی لە بەڕێوەبەری گشتی ئاژانسی نێودەوڵەتی وزەی نوێبووەوە فرانشیسكۆ لاكامیرا، كرد.
‏بەپێی بەیاننامەكە، لە دیدارەكەدا پێداچوونەوەیان بە ڕاپۆرتی هەڵسەنگاندنی گواستنەوەی وزە لە عێراق كرد، كە لەلایەن ئاژانسەوە بە هاوكاری دەسەڵاتە كەرتییەكانی عێراق ئامادەكراوە، ڕاپۆرتەكە وەك سەرچاوەیەك بۆ دەستنیشانكردنی ئەولەویەتەكانی نیشتمانی لە بواری وزەی نوێبووەوە و كارایی وزەدا كاردەكات بەم نزیكانە ڕاپۆرتەكە دەخرێتە بەردەست.
‏هەر بە گوێرەی بەیاننامەكە، سودانی بەخێرهاتنی شاندەكەی كرد،و ڕۆڵی ئاژانس و تیمەكەی بەرز نرخاند لە پێشكەشكردنی پاڵپشتی پێویست بۆ گەیشتن بە قۆناغی گواستنەوەی وردە وردە بۆ وزەی پاك، لە ڕێگەی پێشكەشكردنی راوێژ لە بواری سیاسەت و ئەنجامدانی توێژینەوە و ئامادەكاری بۆ پێداویستییەكانی ڕاپۆرتەكە. هاوكات ئامادەیی حكومەتی دووپاتكردەوە بۆ لێكۆڵینەوە لە ئەنجامەكانی ڕاپۆرتەكە و تێكەڵكردنیان لەگەڵ ستراتیژییە نیشتمانییەكان و جێبەجێكردنی ڕاسپاردەكان لە بوارەكانی ژێرخانی ئابووری و سیاسەت و دارایی.
‏هاوكات سەرۆك وەزیران جەختیكردەوە: لە پابەندبوونی عێراق بە هەمەچەشنكردنی كەرتی وزە و كەمكردنەوەی دەردانی گازی ژەهراوی وەك بەشێك لە دیدگای حكومەت بۆ گۆڕانكاری ئابووری و ژینگەیی. هەروەها تەئكیدی لە لە پابەندبوونی عێراق كردەوە بۆ بەهێزكردنی هاریكاری لەگەڵ ئاژانسەكە لەڕێگەی واژۆكردنی یاداشتەكانی لێكتێگەیشتن و جێبەجێكردنی بەرنامەی هاوبەش بۆ بنیاتنانی توانا و پەرەپێدانی پڕۆژەكانی ووزەی پاك.
‏سودانی تەئكیدیشیكردەوە: لە گرنگی فێربوون لە ئەزموونی گەنجانی عێراق كردەوە كە لە كەرتی وزەی پاكدا كاردەكەن و گرنگیپێدانی خۆیان هەیە بۆ بابەتەكە.
‏لای خۆیەوە لاكامیرا، ستایشی هاوكاری حكومەتی عێراق و وەزارەت و دامەزراوە پەیوەندیدارەكانی كرد لە ئامادەكردنی ڕاپۆرتەكە كە یەكەم هەڵسەنگاندنی هەمەلایەنەیە كە بە هاوكاری حكومەتی عێراق ئەنجام دەدرێت، و جەختیشی لە گرنگی وەرگێڕانی بۆ كاری پراكتیكی و پڕۆژە لە بواری پراكتیكی كردەوە.