سودانی: لەم حکومەتە ڕێژەی پڕۆژە وەستاوەکان کەمیکردووە ‏

13:29 2025-04-16 40762 عێراق 0

2025-04-16

40762

سەرۆک وەزیرانی عێراق رایگەیاند" لەم حکومەتە ڕێژەی پڕۆژە وەستاوەکان کەمیکردووە بۆ کەمتر لە ٨٥٠ پڕۆژە کە لە هەزاران پڕۆژە دابەزیوە".

‏

‏محەمەد شیاع سودانی سەرۆک وەزیرانی عێراق، بەیانی ئەمڕۆ چوارشەممە لە میانی بەشداریکردنی لە دیداری سلێمانی، سەبارەت بە هەڵبژاردنی خولی شەشەمی ئەنجوومەنی نوێنەرانی عێراق ڕایگەیاند" خۆم بۆ هەڵبژاردنی داهاتووی پەرلەمانی عێراق کاندید دەکەم".

‏

‏وتیشی" ڕێژەی پڕۆژە وەستاوەکان کەمیکردووە بۆ کەمتر لە ٨٥٠ پڕۆژە کە لە هەزاران پڕۆژە دابەزیوە".

‏

‏سەرۆک وەزیرانی عێراق ئاماژەی بەوەشکرد، عێراق پێویستی بە چاکسازی بوێرانە و هەمەلایەنە هەیە، بەهای ڕاستەقینەی هەر چاکسازییەک گەیشتنە بە گروپە هەژار و پەراوێزخراوەکان و ڕزگارکردنیان لە چنگی هەژاری.

‏

‏سودانی وتیشی" قبوڵ ناکرێت کێبڕکێی سیاسی بگۆڕێت بۆ بەکارهێنانی زمانی ناوزڕاندن و شاردنەوەی ڕاستییەکان سەبارەت بە ئەدای حکومەت".

‏

‏دەشڵێت" دەستمانکردووە بە بەرزترین پلانی بەرهەمهێنان بۆ دروستکردنی وێستگەی کارەبا و چوونە ناو پڕۆژەکانی وزەی خۆر و پاک و نوێبووەوە بۆ یەکەمجار".

‏

‏ئاماژەی بەوەکرد پڕۆژەمان دەستپێکرد بۆ پەرەپێدانی کەرتی نەوت، فراوانکردنی بەرهەمهێنانی نەوت، و راگرتنی سووتانی غاز بە ڕێژەی زیاتر لە 70%. تا ساڵی ٢٠٢٨ سوتاندنی غاز بە تەواوی دەوەستێت.

‏

‏سەبارەت بە پەیوەندییەکانی هەرێم و عێراق، سودانی دەڵێت" پەیوەندی نێوان هەولێر و بەغداد دەگۆڕێت بۆ پەیوەندییەکی یاسایی و هونەری".

‏

‏لەبارەی لوتکەی عەرەبیشەوە کە لەبەغدا سازدەکرێت وتیشی: لوتكەی عەرەبی بۆنەیەكی گرنگە كە شایستەی بەغدایە و بانگهێشتنامەم ئاراستەی سەرۆكی سوریا ئەحمەد شەرع، كردووە بۆ بەشداریكردن.

‏ناوبراو لە درێژەی قسەكانیدا رایگەیاند: گەلەكەمان بەرگەی ساڵانێكی دوورودرێژی ستەم و فشاری گرتووە، هەروەها بارگرانی شەڕانگێزی هەڵگرتووە. ئەمڕۆ، ئێمە دەچینە ناو چارەكی دووەمی سەدەی بیست و یەكەمەوە، وڵاتەكەمان پڕ بووە لە چیرۆكی سەركەوتنی ناوازە لە هەموو گۆشەیەكدا.