وەفدی ئیمراڵی پەیامی نوێی ئۆجەلان ئاشكرادەكات ‏

01:17 2025-07-07 78780 كوردستان 0

2025-07-07

78780

وەفدی ئیمراڵیی دەم پارتی ناوەڕۆكی كۆبونەوەكەی ئەمڕۆی لەگەڵ عەبدوڵا ئۆجەلان ئاشكراكردو دەڵێت، ئۆجەلان لە كۆبونەوەكەدا وتویەتی، پڕۆسەی چارەسەری چوەتە قۆناغێكی نوێ و بەرپرسیارێتی هەموانە پابەندبن بە داخوازییەكانی پڕۆسەكەوە.
‏
‏وەفدی ئیمراڵیی دەم پارتی، ئێوارەی ئەمڕۆ یەكشەممە، لە راگەیەندراوێكدا وتی، كۆبونەوەكەی ئەمڕۆیان لەگەڵ عەبدوڵا ئۆجەلان كە دو سەعات و نیوی خایاندوە، كۆبونەوەیەكی زۆر باش بوە.
‏
‏وەفدی ئیمراڵیی دەم پارتی جەختی كردۆتەوە كە ئۆجەلان تەندروستی باشە و ورەی بەرزە. لە كۆبونەوەكەماندا ئۆجەلان جەختی كردەوە كە پڕۆسەی چارەسەری چوەتە قۆناغێكی نوێ، بەرپرسیارێتی هەموانە پابەندبن بە داخوازییەكانی پڕۆسەكەو ئەو هەنگاوە نوێیانە كە دەبێت بنرێن.
‏
‏بەگوێرەی راگەیەندراوەكە، ئۆجەلان لەبارەی كۆبونەوەی نێوان وەفدی دەم پارتی و رەجەب تەیب ئەردۆغان كە بڕیارە سبەی دوشەممە بەڕێوەبچێت، وتویەتی، كۆبونەوەیەكی "مێژویی" دەبێت.
‏
‏وەك لە راگەیەندراوەكەی وەفدی ئیمراڵیی دەم پارتیدا هاتوە، ئۆجەلان ئاماژەی بەوەداوە، ئەو لیژنەیەی كە لە پەرلەمانی توركیا پێكدەهێنرێت رۆڵێكی سەرەكی دەبینێت لە ئاشتی و چارەسەردا.
‏
‏وەفدەكە وتیشی، لە كۆبونەوەكەدا بەر بەهێزیی ئومێد و متمانەو باوەڕ كەوتین بۆ بەشداریكردن لە پرۆسەی وەرچەرخانی دیموكراسی لە توركیا.
‏
‏لە كۆتایی راگەیەندراوەكەیدا، وەفدی ئیمراڵیی دەم پارتی ئاماژەی بەوەداوە كە لە كۆبونەوەكەیاندا گوێبیستی ئەوە بون كە چەند سەربازێكی توركی بەهۆی كاریگەریی غازی میسانەوە لەنێو خاكی هەرێمی كوردستان گیانیان لەدەستداوە، "ئەو روداوە بوە مایەی خەمێكی قوڵ بۆ ئۆجەلان و بۆ هەمومان."