هۆشداریەک لە وه‌زاره‌تی ناوخۆ وە بۆ چێشتخانه‌ و شوێنه‌ گشتیه‌كان

23:36 2026-02-19 23968 عێراق 0

2026-02-19

23968

ئەمڕۆ پێنجشەممە ،وه‌زاره‌تی ناوخۆ رێكارەکانی بۆ چاودێریكردنی پابه‌ندبونی چێشتخانه‌كان به‌ ڕێساكانی مانگی ڕه‌مه‌زانی پیرۆز ڕاگه‌یاند.

‏عه‌قید عه‌باس به‌هادلی وته‌بێژی وه‌زاره‌تی ناوخۆی عێراق "وه‌زاره‌ته‌كه‌یان ده‌ستیكردوه‌ به‌ جێبه‌جێكردنی گه‌شته‌ مه‌یدانییه‌ چڕه‌كان كه‌ سه‌رجه‌م چێشتخانه‌ و كافێ و شوێنه‌كانی پێشكه‌شكردنی خواردن و خواردنه‌وه‌كانی له‌خۆگرتوه‌، به‌تایبه‌تی ئه‌وانه‌ی مۆڵه‌تیان نییه‌، وه‌ك به‌شێك له‌ ڕێكاره‌كانی ڕێكخستنی ده‌وام له‌ مانگی ڕه‌مه‌زانی پیرۆزدا".

‏

‏ڕونیشیكرده‌وه‌، "هه‌مو چێشتخانه‌كان پابه‌ندن به‌ داخستنی له‌ ڕۆژدا له‌ مانگی پیرۆزدا، جگه‌ له‌ چێشتخانه‌ ڕێگه‌پێدراو و مۆڵه‌تپێدراوه‌كان به‌پێی ڕێسا و مه‌رجه‌ تایبه‌ته‌كان كه‌ ڕێز له‌ پیرۆزی مانگه‌كه‌ ده‌گرن، جگه‌ له‌وانه‌ش حاڵه‌تی تایبه‌ت هه‌یه‌ بۆ گه‌شتیاران و ئه‌وانه‌ی بیانوی شه‌رعییان هه‌یه‌، به‌مه‌رجێك پێشكه‌شكردنی خواردن به‌ شێوه‌یه‌ك ڕێكبخرێت كه‌ پێچه‌وانه‌ی پیرۆزی مانگی ره‌مه‌زان نه‌بێت".

‏

‏ئاماژه‌ی به‌وه‌شكرد، "مه‌فره‌زه‌كانی وه‌زاره‌تی ناوخۆ ڕۆڵی خۆیان به‌ ته‌واوی جێبه‌جێده‌كه‌ن، به‌و پێیه‌ی مه‌فره‌زه‌كانی به‌ڕێوه‌به‌رایه‌تی به‌ره‌نگاربونه‌وه‌ی تاوانی ڕێكخراو به‌ هه‌ماهه‌نگی له‌گه‌ڵ مه‌فره‌زه‌كانی كۆنترۆڵی بازرگانی و وه‌زاره‌تی ته‌ندروستی كارده‌كه‌ن، هه‌روه‌ها مه‌فره‌زه‌كانی هه‌ماهه‌نگی هاوبه‌ش، له‌ چوارچێوه‌ی هه‌وڵێكی یه‌كگرتو و به‌رده‌وامدا بۆ ده‌ستگیركردنی سه‌رپێچیكاران به‌ درێژایی مانگی پیرۆز".

‏

‏وته‌بێژه‌كه‌ی وه‌زاره‌تی ناوخۆی عێراق باسی له‌وه‌كردوه‌، "رێكاره‌ یاساییه‌كان بۆ هه‌ر كه‌سێك ده‌گونجێت كه‌ سه‌رپێچی ڕێنماییه‌كان و ڕێساكان و یاسا كارپێكراوه‌كان بكات، رێستۆرانته‌كانی سه‌رپێچیكار ده‌ستبه‌جێ داده‌خرێن و خاوه‌نه‌كانیان غه‌رامه‌ ده‌كرێن، له‌ ئه‌گه‌ری دوباره‌بونه‌وه‌ی سه‌رپێچی و كردنه‌وه‌ی دامه‌زراوه‌كه‌ به‌بێ مۆڵه‌ت، ڕێوشوێنی یاسایی دیكه‌ ده‌گیرێته‌به‌ر به‌ تۆماركردنی سكاڵای تاوانكاری و ده‌سه‌ڵاتی دادوه‌ری ڕێڕه‌وی خۆی له‌ دژی سه‌رپێچیكاران ده‌گرێته‌به‌ر".

‏