عەبدولواحید: سودانی بەڵێنی پێ دام لەم دوو رۆژەدا موچەی فەرمانبەرانی هەرێم بنێرێت

18:01 2023-07-31 18179 كوردستان 0

2023-07-31

18179

شاسوار عەبدولواحید، سەرۆكی جوڵانەوەی نەوەی رایگەیاند کە سەرۆك وەزیرانی عێراق بەڵێنی پێداوە لەم دوو رۆژەدا موچەی فەرمانبەرانی هەرێمی كوردستان بنێرێت.
شاسوار عەبدولواحید سەرۆكی جوڵانەوەی نەوەی نوێ لەچوارچێوەی سەردانەكەیدا بۆ بەغدا و لەدوای دیدارەكەی لەگەڵ حەیدەر عەبادی سەرۆكی هاوپەیمانی نەسڕ رایگەیاند، "لەكۆبونەوەكەماندا جەختمان کرد کە نابێت موچەی فەرمانبەرانی هەرێم بكرێتە بەشێك لە كێشە و ململانێكان".
سەبارەت بەدیدارەكەی لەگەڵ سەرۆك وەزیرانی عێراق، شاسوار عەبدولواحید وتی: "محەممەد شەیاع سودانی سەرۆك وەزیرانی عێراق بەڵێنی پێدام لەم یەك دوو رۆژەدا موچەی فەرمانبەرانی هەرێم رەوانە بكات".
وتیشی، "بە سودانیم وت کە فەرمانبەرانی هەرێم تاوانیان چیە ئەگەر یەكێتی و پارتی كەموكورتیان هەبێت، بە نەناردنی موچە سزای یەكێتی و پارتی نادرێت بەڵكو سزای بەكۆمەڵی هاوڵاتیانی هەرێمی كوردستان دەدرێت".
بەگوێرەی زانیاریە میدیاکانی سە بە نەوەی نوێ، "بەیانی ئەمڕۆ دووشەممە لە شاری بەغدا شاسوار عەبدولواحید، سەرۆکی جوڵانەوەی نەوەی نوێ و محەممەد شەیاع سودانی سەرۆک وەزیرانی عێراق کۆبونەوە، لە تەوەرێکی کۆبونەوەکەدا هەردوولا باسیان لە هەڵبژاردنەکان و موچەی فەرمانبەرانی هەرێمی کوردستانیان کرد".
سەرۆک وەزیرانی عێراق، جەختی کردەوە کە "دەبێت هەڵبژاردنی پەرلەمانی هەرێمی کوردستان ئەنجام بدرێت و ناکرێت هەرێم بێ پەرلەمان و خاوەن حکومەتی ماوەبەسەرچوو بێت، چونکە ئەوە نادەستورییە".