سەرۆکی هەرێمی کوردستان پیرۆزبایی جەژنی ڕەمەزان لە موسڵمانان دەکات

22:33 2025-03-29 91331 كوردستان 0

2025-03-29

91331

نێچیرڤان بارزانی، سەرۆکی هەرێمی کوردستان پیرۆزبایی جەژنی ڕەمەزان لە موسڵمانان دەکات و دەڵێت: ئه‌م جه‌ژنه‌ پيرۆزه‌، بۆنه‌ و ده‌رفه‌تێكه‌‌ بۆ ئه‌وه‌ى هه‌موومان پابه‌نديمان به‌ مانا و به‌ها و په‌يامه‌ باڵاكانى له پێكهاتنه‌وه‌، لێبورده‌يى، ئاشته‌وايى، لێكخۆشبوون و مرۆڤدۆستييه‌وه‌ نوێ بكه‌ينه‌وه.

دەقی پەیامی سەرۆکی هەرێمی کوردستان:

هاتنه‌وه‌ى جه‌ژنى پیرۆزى ڕه‌مه‌زان له‌ ته‌واوى موسڵمانان له‌ كوردستان، هه‌روه‌ها له‌ عێراق و جیهان، به‌تایبه‌تيش له‌ بنه‌ماڵه‌ و كه‌سوكارى سه‌ربه‌رزى شه‌هیدان پیرۆز بێت. هيوادارم هه‌مووان جه‌ژن و پشوویه‌كى ئارام و ئاسووده‌ و پڕ له‌ كامه‌رانى به‌سه‌ر به‌رن و به‌ خێر و خۆشى بۆ هه‌موو لايه‌ك بگه‌ڕێته‌وه‌.

ئه‌م جه‌ژنه‌ پيرۆزه‌، بۆنه‌ و ده‌رفه‌تێكه‌‌ بۆ ئه‌وه‌ى هه‌موومان پابه‌نديمان به‌ مانا و به‌ها و په‌يامه‌ باڵاكانى له پێكهاتنه‌وه‌، لێبورده‌يى، ئاشته‌وايى، لێكخۆشبوون و مرۆڤدۆستييه‌وه‌ نوێ بكه‌ينه‌وه‌، به‌ په‌يوه‌ندييه‌كانماندا بچينه‌وه‌ و له‌سه‌ر بنه‌ماى ڕێز و خۆشه‌ويستى، دۆستايه‌تى و هاريكارى، دايانبڕێژينه‌وه‌.

هيوادارم جه‌ژن و بۆنه‌كانى داهاتوو، بۆ هه‌مووان له‌ دۆخ و ڕۆژگار و ژيان و گوزه‌رانێكى باشتردا بێنه‌وه‌ و هه‌موومان پێكه‌وه له‌ هه‌رێمى كوردستان و عێراق‌، يه‌كڕيز و ته‌با، بتوانين باشتر خزمه‌تى گه‌ل و نيشتمان بكه‌ين.

جه‌ژن له‌ هه‌مووان پیرۆز بێت، هه‌موو ساڵێك به‌ خۆشى.

نێچیرڤان بارزانى
سه‌رۆكى هه‌رێمى كوردستان

٢٠٢٥/٣/٢٩